قصيدة الشاعرة / رشا الفوال
من ديوان "ألف حيلة وحيلة "
باثَبت روحي واخدعها
ووقت الجد اسمّعها
كلام يوجع
وبارجع تاني ادلعها
وباتدلع على السامعين فصوتي صداااه
واطبطب برضه على جرحي في ساعة الآآآه
واروح للموت انا برجلي
واضمه في حضني مايخافنيش
ومايقوليش ميعاده الجاي
واقرَّب منه فين ؟ وازاي ؟
واحب خيالي في العتمة
ونرقص رقصة لجهنم
تكون حمرا
ونتخانق .. ونرفض بعض
ونقتل بعض على فكرة
أنا روحي ومش هيَّ
وهيَّ الفرض والنيَّة
في ساعة الصبر والإخبات
بنمحي القسوة بالضحكة
دموع القلب دي شكَة
لازمها ثبات
بتحرمني اشوف النور
وباحرمها كلامي ساعات
لكن ساعة الأمور ماتدور
بنلزم بعض بالفهرس وبالأجزاء
أنا روحي ومش هيَّ
ويفصل بينا حَد.. سواء
جنون العشق يستحوذ
فنتحفز
ونسرد نور على استحياء
EmoticonEmoticon