الشاعر /بكري جابر
..............................
سقراااط هناك
من بين حواري (دلفي) والعقول
عمال بيسأل ف العيال
إنت ابن مين ؟!
ويصب كاسات الأمل ف قلب كراس البنات
- مهو مش محال
انك تدوم مليون سنة مصباح علاء للشقيانين -
يفرش حصيره ع التراب
وبضحكة يفتح ف العقول
ينقش على وش البيوت
حرفين وبس ....
يفتح فدادين المحال
ويصلي فوق سطح القمر
يُوِصل ما بين عرش الإله والعارفين ...
مليون طريق ويهد ساعات السفر
لساه هناك
داير يخبط ع البيوت
إوعاك تموت
إسبرطة ماتت من زمان
إرخي اللجام
وافرد شراعك للسما
مفيش سما
عدي الحدود
معبد إلهك جوه فيك
وكمان حبال المشنقة
سقراااااط ولي
بعد اما تاه فينا النبي
حرب البسوس
لساها دايرة فى النفوس
وع الحصير
لسانا بنغمي العيال
خليك يمين !!
مع إن لو مرة تقول
إنت ابن مين ؟!
هنخطي فوق كل الحياه
ويصلي فوق ناطحة سحاب سيدناالوليّ
وع الصراط
خلف محمد والحسين
ياكل هناك
وبكل إيد
ويباهي بيه سيدنا النبي
سقراط هناك
لساه بيتهجى الحروف
واحنا هناك ...
بنغني لشعور البنات
ونغمي ف عيون الصبي
EmoticonEmoticon