شعر : مجدي عبدالرحيم
..................................
العَسس فتش ف قلبه
مين بيهوى ..
مالتقاش
العسس فتش ف عقله
لمين بيقرأ ..
وإيه ميوله ..
مالتقاش
العَسس فتش جيوبه
وين يا ترى راحت فلوسه ..
مالتقاش
العَسس عمَّال يراقبه ..
وين بيسهر ..
و مين يقابل ..
وليه هدومه مش جديده ..
وليه عيونه مش سعيده ..
وليه يبيع ف عفش بيته ..
و يرضى يقعد ع الحديده
قالوا :
يمكن يكون عبيط
و لا باينه حويط
زى حالة ناس كتير ..
فى البلد دى
العسس إحتار ف أمره
مش عارفين يصنفوه
يكتبوه ف الخانة [ب]
برئ ..
و يسيبوه
و لا [ج]مجرم ..
و يسجنوه
قالوا :
نسأل الكبير
و الكبير قال :
- هاتوه
لاعاد بيهوى ..
و لا بيقرا ..
و لا بيصرف ..
ولا بيسهر
ده مواطن مظبوط تمام -
ياللا بينا ع الأمير
لبسوه .. وجهزوه ..
وحفظوه ..
إيه يقول م الكلام ..
اللّى يرضى الأمير
الأمير عطا له جايزة الإماره
أعلى وسام
- دانت يا ابنى مثال و قدوة
للمواطن المستقيم -
الحضور : ردد وأيد
ده مواطن مستقيم
ده مواطن مستقيم
و الحقيقة المرَّة كانت ..
صنفوه ..
حاله جيم
EmoticonEmoticon