شعر: محمد أحمد إسماعيل
..........................
مين اللى مات ؟؟
ما تبطلوا إشاعات !!
كل الحكاية إنه راح يجدد الباسبور
وقف لآخر النهار
و ما جاش عليه الدور
و هو راجع افتكر
إنه " ممنوع من السفر "
و قلبه كان مشتاق قوى للشيخ إمام
و ملجأ الأيتام
و طه حسين وشوقى و العقاد
وبيرم التونسى و جاهين
و لمعة خجل فى عيون فؤاد حداد
و لمة العشاق فى سجن القلعة
و كان راسمهم قصايد
و كان فاكرهم نفر نفر
و قلبه كان مشتاق
لخوش قدم و بولاق
و أسامة أنور عكاشة
و نجيب محفوظ
و جمال حمدان
و الشيخ محمد رفعت
و شادى عبد السلام
و البندقية اللي صَدَّت
ف إيدين عساكر القشلاق
و ف زحمة الشوارع
و ضحكة الشهداء
لمعت كتير أسماء
ساعتها بس افتكر
إن السفر للسما
و مقابلة الأحباب
مش محتاجين جوازات
و لا لستة " ممنوعات "
و لا طابور و لا دور
دول محتاجين يدوب جناحين
و رعشة قلب
وغمضة عين
قام قطع الباسبور
و خبط برجله الأرض بالحنية
و خطى " سور ورا سور "
و زمانه عند الباب
بيوزع السلامات
مين اللى مات ؟؟
ما تبطلوا إشاعات !!
EmoticonEmoticon